BUTUAN CITY – Gisubmite sa mga supporters ni kanhi Pangulong Rodrigo Duterte ngadto sa Korte Suprema ang laing batch sa mga pirma pagpanguna sa mga organizers nga matud pa, nagpakita sa boluntaryo nga suporta ug dili tungod sa insentibo.
Sumala sa supporter nga si Joie Cruz, nakatigom na ang kampanya og 304,000 ka mga pirma gikan sa tibuok nasud kansa nagrepresentar sa tinuod nga sentimiento sa publiko nga nag-awhag sa Korte Suprema nga aksyunan ang mga petisyon nga nangayo og writ of habeas corpus alang kang Duterte, nga karon gidetine sa Netherlands ubos sa mando sa International Criminal Court (ICC).
Ang pinakabag-ong mga pirma gidala ni Senador Robin Padilla, kansa gisulod og maleta nga puno sa bag-ong nakolektang forms.
Sa gawas, nag-rally ang mga supporters nga nanawagan sa pagbalik ni Duterte ug nag-awhag sa mga mahistrado nga desisyunan na ang mga pending petitions.
Ang mga petisyon sa habeas corpus mibarog nga ilegal ang pagdakop ug pagdetine kang Duterte ug kinahanglan nga ang gobyerno sa Pilipinas ang mag-angkon sa hurisdiksyon ug dili sa international tribunal, kondili sa lokal nga law enforcement agency.
Bisan pa niini, gipamugos sa mga organizers nga ang Korte Suprema adunay konstitusyonal nga papel nga buhaton.
