BUTUAN CITY – Gihupay ni Sultan Gamal Amerol, sultanate sa muslim community sa Caraga ang kabalaka sa mga kristiyanos, nga basin nakasulod na ang teroristang Maute Group sa Butuan City dungan sa pag-abot sa mga bakwit nga muslims gikan sa Marawi City.
Nasayrang kagahapong adlawa, mga alas 3:00 sa hapon, miabot ning dakbayan ang gibana-banang 30 ka pamilyang muslim nga bakwit gikan Marawi City human na-ipit sa kagubot nga gipasiugdahan sa terorista.
Pasabot pa ni Amerol, sila mismo ang magmonitor nga dili masagolan ug terorista ang mga bakwit dungan sa pagbutyag nga dili sila mutugot nga gub-on sa terorista ang ilang kinabuhi hinungdang hangtud sa ilang makaya, dili nila pasudlan ug terorista ang rehiyon, ilabina ang siyudad sa Butuan.
Kini ang rason sa hugot nilang pagsuporta sa lokal nga kagamhanan ug otoridad mapahapsay lang ang dakbayan. Sa pag-abot sa mga bakwit gikan sa Lanao Del Sur, lakip matud pa si Sultan Amerol ang nangunay sa pagkuha sa profile sa mga niini aron masayran ang kumpletong detalye sa ilang pagkatawo.
Lakip na niini ang ilang kaparyentihan ning siyudad nga ilang kapuy-an ug asang dapita sila sa Lanao Del Sur nagsumikad. Apan giklaro sa sultan nga init nilang gidawat ang mga bakwit. (Rolan Janea)
