BUTUAN CITY – Gipang-apod apod na sa mga lungsod sa Siargao Islands sa Surigao del Norte ang 30 ka mga generator sets ug 300 ka mga solar panels nga nangabot kaganina sa maong isla karga sa C130 plane.
Tumong niini nga mapadayon ug mas mapalapdan pa ang libreng charging sa mga munisipyo sa kagamitan nga nanginahanglan og kuryente. APil sa nakadawat niini ang lungsod sa San Benito kansa na-atol usab sa ilang Tulong Panghanap-buhay sa Ating Disadvantaed/Displaced Workers kon TUPAD pay-out.
Una nang gibutyag ni Surigao del Norte Governor Robert Lyndon Barbers nga gila-umang mukaon pa og 10 ka mga adlaw ang pagsuhid sa daot nga submarine cable sa Siargao Electric Cooperative kon SIARELCO sa kadagatan sa sikat nga isla adiser hingpit nang mabalik sa normal ang linya sa kuryente.
Kini tungod kay wala pa makita sa mga taga-SIARELCO kon Siargao Electric Cooperative ang daut sa kapin 20 kilometros nga gitas-on sa submarine cable, human nga una nang nasuhid sa mga expert divers ang 1.9-kilometros sa maong cable ug nasuta nga wala kini damyos, hinuon nalambod lang. Alayon niini, gi-awhag ni Governor Barbers ang mga Surigaonon nga magtinabangay ug dili matud pa ipatigbabaw ang pamulitika.
