BUTUAN CITY – Naghatud na og hinabang ang probinsyal nga panggamhanan sa Agusan del Sur ngadto sa nga residente sa Marawi City nga namakwit sa lungsod sa Pantaw Raga sa Lanao del Sur kagahapon.
Sigon ni provincial board member Santi Cane, gibana-banang mukabat sa 1,400 ka mga pamilya nga anaa sa evacuation centers ang una nilang gihatagan og mga relief goods.
Gikan sa maong lungsod, mideretso sila sa 4th Reconnaissance Battalion aron usab pagtunol og pagkaon ngadto sa kasundaluhan sama sa chocolates apil na ang mga gamit pangligo sama sa sabon humot, shampoo, toothpaste, toothbrush ingon man food packs.
Dugang sa opisyal, plano pa unta nilang mu-adto sa munisipyo sa Baloi aron manghatag og hinabang apan tungod kay ang lungsod ra sa Pantaw Raga ang gisugyot kanila sa DSWD-ARMM, hinungdan nga didto nakatutok ang ilang relief operations apil na sa mga namakwit sa Ma. Cristina.
Bisan og tulo ka trakan sa mga pagkaon ang ilang dala alang sa mga evacuees sa Marawi City, apan aminado ang opisyal nga dili pa kini igo sa kadaghan sa mga namakwit. (Beth Ruiz)
