BUTUAN CITY – Nagpadayon pa ang pagpalawom sa imbestigasyon sa mga sakop sa Barobo Municipal Police Station subay sa nahitabong pagpusil ngadto sa usa ka barangay kagawad sa Brgy. Sua, Barobo, Surigao del Sur.
Sa pakighinabi ning sibyahan, gi-ila ni PCI Joseph Gimentiza, hepe sa Barobo Municipal Police Station, ang biktimang si Robert Cacayan Arenzano, usa sa mga nakadaog nga barangay kagawad sa Brgy. Sua.
Gawas kaniya, lakip sa mga napagan sa pagpamusil sila Gernalyn Antipasado Condolon, usa ka public school teacher, residente sa Purok 4, Brgy. Anibongan, Lianga, Surigao del Sur, Jonathan Demoral ug 6-anyos nga anak niining si Honey John Lee Demoral, parehong nagpuyo sa Purok 1-A Brgy. Poblacion, Barobo, Surigao del Sur.
Sumala sa imbestigasyon, sakay sa iyang single-motor ang biktima gikan sa iyang barangay padulong sa Brgy. Poblacion sa maong lungsod, dihang kalit lang kining gipusil sa duha ka riding in tandem suspects sakay sa lain usab nga motorsiklo.
Nakahimo pa ang biktima pagdangop sa kapulisan aron makapangayo ug tabang hinungdan nga dali kining gidala sa balay-tambalanan.
Apil sa mga anggulong ilang gitutukan ang negosyo ug mga gilambigitangtransaksyon sa biktima.
Sa pagkutlo niini nga balita, padayon pang gipakisayran ang kondisyon sa mga biktima kinsa padayon pang gitambalan ug nagpadayon pa usab ang pagpangita sa mga responsable. (Beth Ruiz)
