BUTUAN CITY – Luwas na sa makuyaw nga kahimtang ang tulo ka mga samaron sa natigayong aksidente sa kadalanan sa may Purok-7, Barangay Matabao, lungsod sa Buenavista, Agusan Del Norte kaganinang alas 4:00 sa kaadlawon.
Sigon ni PO2 Cezar Cañete sa Buenavista Municipal Police Station, nakatulog matud pa ang nagmanehu sa Bongo nga dunay plaka numero MFP 307 nga gikan nangumpra ug karne sa may Langihan ning siyudad sa Butuan ug pauli na unta sa Carmen, Agusan Del Norte.
Imbes nga ang brake ang tamakan sa nagmanehu nga si Gelnes Budbod Cabanatan, 22-anyos, olitawo nga taga Talisayan, Misamis Oriental, ang gasolinador na hinoon ang natumban hinungdang maayong pagkabang-ga niini sa colbert.
Tungod sa kakusog sa impact, halos natunga pa ang sakyanan human mi-igo sa semento.
Nakahi-agum ug mga bun-og ug mga samad sa kalawasan ang mga biktima diin parehong na-ipit ang drayber ug sakay niining 15-anyos nga babayeng si Jean Rose Buhawe, nga taga San Isidro, Magsaysay, Misamis Oriental nga nabalian sa iyang wala nga tiil.
Nakuha ang mga biktima gikan sa pagka-ipit mga bandang alas 7:00 na sa buntag sa pag-abot sa mga personahe sa Bureau of Fire Protection kon BFP-Butuan dala ang ilang mga kahimanan sama sa spreader ug daling gidala sa Agusan Del norte Provincial Hospital.
Gilauman usab nga abagahon ang galastuhon niini sa tag-iya sa sakyanan nga si Manuel Ceniza na taga-Carmen, Agusan Del Norte.
