BUTUAN CITY – Gipasidunggan sa Police Regional Office kon PRO-13 ang tulo ka mga pulis nga na-angol sa natigayong engkwentro tali sa mga rebeldeng New People’s Army kon NPA sa Sitio Kabayawa, Brgy. Poblacion, Carmen, Agusan del Norte.
Sigon ni P/Supt. Martin Gamba – information officer sa maong buhatan, mismong si regional director Chief Supt. Rolando Felix ang nagtaud og Medalya ng Sugatang Magiting ngadto nila PO1 Ricky Arcite, PO1 Danilo Valenzuela og PO1 Diomar Guiral, pulos sakop sa Technical Support Platoon sa Regional Public Safety Battalion kon RPSB -13.
Mibisita mismo sa ospital nga gidalhan sa mga biktima si Gen. Felix kondiin gawas sa medalya, gihatagan usab ang tagsa-tagsa kanila og tag-50 mil pesos nga special financial assistance.
Gipasabot sa opisyal nga ang Medalya ng Sugatang Magiting kon PNP Wounded Medal, usa sa pinakataas nga medalyang mahatag sa regional director ngadto sa iyang mga sakop ilabina nga wala’y pulis nga gustong makadawat niini.
Malipayon usab nga gitaho sa opisyal nga anaa na sa luwas nga kahimtang ang tulo ka mga pulis. (Beth Ruiz)
