BUTUAN CITY – Bangi sa yuta ingon man away sa kabanay ang lakip sa mga anggulong gitutukan karon sa kapulisan sa Trento, Agusan del Sur sa pagpusil-patay sa tulo ka mga tawo pasado alas-otso kagabii sa may Purok 2. Brgy. Tudela Trento nga mibiktima sa kanhi kapitan sa maong lugar.
Sa eksklusibong pakighinabi sa Bombo Radyo Butuan, gi-ila ni PMajor Carmelo Malubay, hepe sa Trento Municipal Police Station ang mga biktimang sila kanhi kapitan Edmar Llames, tagbalay nga si Yoyoy Asis kinsa bana sa manghod sa kanhi kapitan ug ang bodyguard niining si Tani Montes.
Sigon ni Major Malubay, mitawag kanila si incumbent Kapitan Noel Reano ug gipahibalo ang maong pagpamusil kondiin ilang na-abtan nga nagbuy-od na ang patayng lawas sa may kusina nga bahin samtang ang usa, dool sa eskwelahan sa maong barangay.
Dugang pa sa opisyal, nanihapon matud pa ang mga biktima dihang kalit silang gisulod sa tulo ka mga lalaking ug gipamusil apan wala gi-apil ang manghod sa kapitan ug ang anak niini.
