BUTUAN CITY – Abagahon sa tag-iya sa mining tunnel ang tanang galastuhon alang sa haya og pagpalubong sa tulo ka mga minero nga namatay human nakalanghab og makahilong gas o kemikal sa lungsod sa Placer, Surigao del Norte.
Kini ang kinumpirma ni P/Chief Insp. Manolito Parazzo, hepe sa Placer Municipal Police Station dungan sa pag-ila sa mga namatay nga sila Angelo Alontaga, 35-anyos, Ryan Ilacion, 35-anyos og ang 20-anyos nga si Freddie Basilio, parehong residente sa Brgy. Magsaysay sakop sa maong lungsod.
Sigon sa ilang inisyal nga imbestigasyon, anaa matud pa sulod sa tunnel ang duha sa mga biktima ka-uban ang nakagawas nga si Jonathan Cutamora, 20-anyos, dihang nalanghab nila ang makahilong alisngaw.
Si Cutamora na ang nakasulti sa ilang nadangatan hinungdan na misulod ang usa pa nila ka ka-ubanan aron unta luwason ang duha apan wala na usab kini makagawas pa.
Nahitabo kini sa Sitio Layab, Brgy. Ellaperal sa lungsod sa Placer sa mining tunnel nga gipanag-iyahan ni Martin Hesta. (Beth Ruiz)
