BUTUAN CITY – Dungan nga namatay ang tulo ka membro sa usa ka pamilya human ang dugu-ong aksidente pasado alas-9:05 kagahapon sa buntag sa national higway sa Purok 6, Brgy. Bonifacio sakop sa Surigao City.
Kini human nabanggaan sa Hi-Ace van ang traysikol nga gisakyan sa pamilya Gingo padulong unta sa city proper gikan sa Brgy. Boyongan, sa lungsod sa Placer, Surigao del Norte.
Nasayrang samtang lulan sa motorsiklo ang mga biktima nga gimaneho ni Wilbert Gingo, 45-anyos sakay ang iyang asawa og anak, nakasugat nila ang de-pasaherong puting Toyota Hi-Ace van, nga gipanag-iyahan ni Reynaldo Acevedo og gimanehuan ni Recto Dolorico Acevedo, 37 anyos ulitawo og residente sa P-2A, African Daisy, Brgy. Poblacion, Carmen, Surigao del Sur.
Sigon sa mga nakasaksi, mibuto matud pa ang walang ligid sa likod nga bahin sa van hinungdan nga nawad-an og kontrol ang driver nga miresulta sa pagkabangga niini sa kasugat nga tricycle.
Tungod sa kusog nga impact nabuwag ang motorsiklo gikan sa side car nga mitikla-ob taliwa sa kalsada rason sa on the spot nga pagkamatay ni Marlina Gingo, 41 anyos og anak niining si Khean Mark Amora Gingo, 2 anyos.
Nadala pa sa Caraga Regional Hospital ang driver sa tricycle apan namatay gihapon kini samtang gitambalan.
Unang misibat ang driver sa van human ang insidente hangtud nga boluntaryo na kining misurender sa kapulisan. (Melody Valledor)
