(photo credit: Dar Wyn)
BUTUAN CITY – Wala na naka-abot pa sa ilang trabahuan ang tulo ka mga laborers human napatay on-the-spot tungod sa pagbangga sa ilang gisakyang motorsiklo sa kasugat nga van kaganinang buntag sa kurbada og pasakang bahin sa national highway sa Purok 2, Brgy. De Oro ning siyudad sa Butuan.
Na-ila ang mga namatay nga sila Remlani Matilos, Jorge Rubio og ang driver sa gisakyan nilang motorsiklo nga si Adorico Tumlon Castro, parehong taga Brgy. Wawa, Bayugan City, sa lalawigan sa Agusan del Sur.
Sigon sa driver sa van nga si Isidrico Tubo residente sa Brgy. Punta, Nasipit, Agusan del Norte, kusog ang dagan sa motorsiklo nga padulong sa sentrong bahin ning siyudad nga wala mi-agi sa saktong lane hinungdan nga wala na nakalikay pa sa iyang gimanehuang van nga padulong sa Davao area resulta sa maong aksidente.
Nalabay gilayon ang mga sakay sa motorsiklo og tungod sa kakusog sa impact pareho silang nakabsan gilayon sa kinabuhi samtang wala usa’y natalang injury sa mga sakay sa van. (Beth Ruiz)
