BUTUAN CITY – Misangpot sa kamatayon sa tulo ka mga sundalo og pagka-angol usab sa lain pa ang nahitabong aksidente sa kadalanan kagahapon sa alas 4:00 sa hapon sa may Purok-18, Brgy Poblacion, Prosperidad, Agusan del Sur.
Sa impormasyong nakuha ning sibyahan, nagsumikad sa San Francisco, Agusan del Sur ug padulong unta sa Bayugan City ang usa ka Starex Van nga gimaneho ni Jaime Abrea Lao, 48-anyos, menyu, negosyante ug residente sa Brgy 4, San Francisco, sa maong lalawigan apan pag-abot sa dapit nga nahitaboan, kalit nga misulay sa pag-overtake ang Toyota Fortuner nga nakapangalan sa lokal nga kagamhanan sa Bayugan City nga gimaneho ni Eldryn Mendoza 29-anyos ug residente sa 617 Metor Garden St Maimpis, San Fernando, Pampanga.
Tungod sa nakitang kasugat sa nag-overtake, mibalik sa iyang linya ang Fortuner rasong nabanggaan kini sa van resulta sa aksidente.
Nakaresponde usab ang mga SARAS rescuers ug nadala sa hospital ang mga sakay sa nalambigit nga sakyanan apan nakabsan sa kinabuhi ang drayber sa Fortuner nga si PFC Eldryn Mendoza ug sakay nga sila 2LT Mary Joy Salentes ug PFC Arden Sumpio 31-anyos nga residente sa P-23, Sunrise Valley Subd, Brgy Lagao, General Santos City ug parehong miyembro sa Philippine Army.
Samtang padayong gi-obserbahan ang kahimtang sa ilang kauban nga si 1LT Robert Calatrava Ching, 29-anyos ug ang drayber sa van nga si Lao.
Sa kasamtangan, gipahiluna na sa pribadong punerarya sa may Brgy Pisaan, lungsod sa San Francisco, ang napatay sa maong aksidente nga gilaumang ipailalom sa post mortem examination.
