BUTUAN CITY – Gitaho sa 4th Infantry Division, Philippine Army nga duha ka tag-as nga opisyal og usa ka miyembro sa communist terrorist group ang napatay sa kasundaluhan sa managlahing engkuwentro sa Jabonga, Agusan del Norte og Gingoog City, Misamis Oriental niadtong Mayo 20 og 21, 2024.
Niadtong Mayo 21, ang tropa sa 16th Infantry Battalion miresponde sa gipaabot nga impormasyon sa nagpakabanang sibilyan sa Brgy. Bal-ason, Gingoog City, Misamis Oriental mahitungod sa presensiya sa New People’s Army kon NPA nga mihimo og pagpang-recruit og pagpangikil nga miresulta sa engkuwentro batuk sa miyembro sa Sub-Regional Sentro De Gravidad MTJ Eagles sa Sub-Regional Committee 1sa North Central Mindanao Regional Committee.
Human sa 10 minutos nga engkuwentro napatay si Zaldy Galamiton alyas Shaggy/Poldo, Secretary sa Sub-Regional Committee 1 og Jhonjhon Ayuma Ramos alyas Erbing, Commanding Officer sa maong unit.
Lakip sa nakuha ang duha ka M16 rifles, bandoliers, magazines, mga bala og personal nga mga gamit. Samtang niadtong Mayo 20, usa ka miyembro sa NPA nga nailang si Berto Dayong alyas Sadam/Jenel, ang napatay sa engkuwentro tali sa Squad 2, Platoon 1 sa SRSDG West Land og tropa sa 29th Infantry Battalion sa Sitio Madbad, Bangonay, Jabonga, Agusan del Norte.
Nakumpiska usab sa encounter site ang usa ka Caliber 9MM Pistol og usa ka Caliber .45 Pistol.
