BUTUAN CITY – Balik-Pilipinas na karong adlawa ang tulo ka mga Pinoy rescuers nga apil sa rescue operation sa Palu, Indonesia kansa maoy grabeng na-apektuhan sa linog og tsunami niadtong hinapos sa Septembre.
Sigon ni Rey Garnace, magtutudlo gikan sa Philippine Normal University kon PNU-Leyte ug miyembro sa Sauveteurs Sans Frontières kon SFF ug lakip sa nagpahigayon ug rescue operation sa Palu, susamang senaryo ang ilang na-abtan sa Indonesia sa nahitabo kaniadto sa Tacloban City dihang gikuso-kuso kini sa storm surge tungod sa bagyong Yolanda.
Saysay pa niini sa eksklusibong pakighinabi sa Bombo Radyo Butuan, niadtong nihapak ang kalamidad sa Indonesia pinaagi sa kusog nga linog nga gisundan sa tsunami, mitawag kaniya ang SSF sa Israel og nagsugyot sa mutabang siya sa operasyong himuon rason nga naka-uban niya sa gimugna niyang rescue team ang mga kababayang sila Robert Abueva og Melvin Serrano nga pulos taga-Tacloban City.
Nagpakitabang pa sila sa ilang mga kaila nga taga-Indonesia og sa Philippine Embassy ingon man sa Bureau of Immigration aron tugutang makasulod dungan sa pagbutyag nga istrikto ang gobyerno sa Indonesia diin dili basta-basta makasulod ang langyaw nga motabang sa rescue operation.
Sumala pa Garnace, hilabihan kadako ang damyos sa maong nasud ilabina sa coastal areas kondiin misugat kanila ang baho sa nadugta nang kalawasan sa mga tawo og mingaw pa kaayo ang lugar nga daw usa na ka ghost town.
Bilib siya sa kapaspas sa rescue operations sa mga Indonesians kondiin sa ilang pag-abot niadtong Oktubre 4, ma-agian na ang mga kalsada apan ang mga tawo anaa lang sa gawas sa ilang panimalay og sa evacuation center tungod sa kahadlok nga matumpag pa ang mga dakbalay tungod sa padayonbg mga after shocks.
Walay kuryente usab sa na-apektuhan sa kalamidad samtang wala pa nakarekober ang mga negosyante diin pipila lang ang nag-abli sa ilang negosyo og ang uban nagtinda-tinda nalang sa gawas. (Rolan Janea)
