BUTUAN CITY – Gikuha na ni Jimmy Santos, taga-Brgy. Cala-cala, lungsod sa Balingasag, Misamis Oriental, ang iyang anak nga si Rito Santos alyas Bugoy, 8-anyos, kinsa gihatud nong sibyahan sa usa ka pulis niadtong Enero 2 human nila nasugatan sa dalan nga wala’y ka-ubang ginikanan.
Wala na napa-abot pa ni Santos ang saad sa mga personahe sa Butuan City Social Welfare and Development kon CSWD nga ilang ihatud ang bata ka-uban ang ig-agaw niini og usa ka silingan, karong Enero 12.
Una na untang plano sa Butuan CSWD nga sa sangang-buhatan nila sa lungsod sa Balingasag, Misamis Oriental ihatod ang tulo ka mga batang napapag dinhi sa Butuan human matud pa namasko.
Gi-ila ni Lovelyn Plaza sa Butuan-CSWD, ang mga bata nga sila Stanley Dahan, 9-anyos og ang mag-agaw nga sila Juris, 9-anyos og Bugoy Santos, 8-anyos, pulos mulupyo sa Brgy. Cala-cala, sakop sa lungsod sa Balingasag.
Mahinumdumang usa sa mga bata nga si Bugoy, duha ka gabii og tulo ka adlaw nga gi-atiman ning sibyahan human gihatod sa usa ka pulis.
Gi-turn over gilayon kini kagahapon ngadto sa CSWD og didto nasuta nga atua na usab sa maong buhatan ang laing duha. Wala na matud pa’y angayang kaalak-an ang ginikanan sa mga bata ilabina sa pamasahe kay sila na mismo ang muhatod sa mga bata ngadto sa mga opisyal sa maong lungsod.
Dugang ni Plaza, migawas sa ilang inisyal nga pag-imbestiga sa mga bata nga pito silang tanan nga nag-uban padulong ning siyudad hinungdan nga ila nang gipangita ang laing upat.
Nanawagan kini sa tanan nga ihatod gilayon sa ilang buhatan ang mapalgang mga bata.
Samtang giklaro usab sa amahang si Jimmy nga grabe na niyang pangita sa iyang anak og sa mga ka-ubanan niini hangtud nga nakakuha sila og impormasyong ania kini dinhi sa sibyahan hinungdanag gisundo niya kini kaganina. (Beth Ruiz)
