BUTUAN CITY – Nasikop pagbalik sa kapulisan sa Kitcharao, Agusan del Norte, ang usa sa tulo ka managsoong Dadong kinsa nanulis ug namusil-patay sa usa ka tindahan sa maong lungsod ning mi-aging mga semana human mi-ambak dihang gidala sa korte kagahapong adlawa.
Naila ang nasikop nga si Roland Dadong samtang at-large pa ang duha niini ka mga igsoong sila Raymund ug Ronald Dadong nga nakaposas pa sa ilang mga kamot.
Sa eksklusibong pakighinabi sa Bombo Radyo Butuan, gibutyag ni PLt. Ella Mae Batobalonos, tigpamaba sa Agusan del Norte Police Provincial Office, nga gidala matud pa ang tulo ka managsoon sa Regional Trial Court sa Brgy. Libertad ning siyudad kagahapon alang sa preliminary investigation sakay sa police car nga duna pa’y laing sakyanang nag-convoy.
DIhang pa-uli na sila kagabii, kalit lang naglumba og ambak ang tulo pag-abot nila sa Brgy. Baleguian, lungsod sa Jabonga, ug bugtong si Roland Dadong lang ang nadakpan. Nakig-alayon na sila sa kasikbit nga mga municipal police stations dayong awhag sa katawhan nga kung makita ang mga responsable, i-report gilayon sa pinakaduol nga police station tungod kay mga notorious criminals sila ug duna na’y report sa pagpatay.
Madumdumang napasakaan na og kasong robbery with homicide ug robbery with frustrated homicide ang tulo human nila gipusil-patay si Ginalyn Apolinario samtang angol usab ang anak niining si Evangeline Apolinario ug ang tag-iya sa tindahan nga si Brgy. Kapitan Salvador Junio.
