BUTUAN CITY – Nagpasaka na og kasong syndicated estafa ang usa ka membro sa Kabus Padatoon kon KAPA Community Ministry International Incorporated ngadto sa National Bureau of Investigation kon NBI-Caraga batuk kang KAPA founder Joel Apolinario.
Sigon sa reklamanteng gitago lang sa pangalang Langga, base sa inisyal nga assessment sa taga-NBI, lig-on ang kasong iyang gipasaka. Kini tungod na usab sa mga ebidensyang iyang gisubmite sama sa membership form og ang papel nga iyang gikuptan diin nakalatid ang 10-mil pesos nga kwartang iyang gi-invest kansa pirmado ni Apolinario.
Tungod niini, hayag matud pa ang posibilidad nga makuha ang iyang kwarta kansa alang sa uban gamat ra kumpara sa ubang membro apan iyang gihingusgang makuha sa rasong gihaguan nila kini.
Human mipasaka og kaso si alyas Langga, mipasaka na usab og kaso ngadto sa NBI-Caraga ang duha ka mga babaye nga gilangkuban sa usa ka membro og usa ka agent.
Sama kang alyas Langga, tinguha usab nilang makuha ang ilang gi-donate nga kwarta human nakamata nga dili nila kini makuha kung wala pabilin lamang silang magpakahilom og mutuo sa mga pasi-atab sa mga midepensa sa KAPA og kang Apolinario.
