BUTUAN CITY – Karon nang alas sais sa gabii sugdan ang International Youth Camp 2017 nga himuon sa usa ka pribadong hotel ning siyudad sa Butuan.
Sugod kaganinang buntag, nangabot na ang mga delegado alang sa tulo ka adlaw nga kalihukan.
Gibutyag ni Butuan City Councilor Glenn Carampatana, apil sa nangabot ang mga delegado gikan sa South Korea, Vietnam, Mongolia, Australila og uban pa kondiin gila-umang mukabat sa 800 ka mga delegado ang mulambigit sa maong kalihukan.
Ang gibana-banang 300 ka mga delegado ning siyudad langkuban sa mga opisyal nga estudyante sa mga pampublikong high schools og kasikbit nga mga lalawigan sulod sa Caraga Region.
Dinhi sa Butuan, gi-abaga sa lokal nga kagamhanan ang galastuhan sa gipadalang mga school presidents og ubang mga school officials ilabina ang ilang registration fee.
Duna na’y gi-andam nga cultural show ang lokal nga kagamhanan nga makita sa mga langyaw’ng delegado ugma sa gabii kansa kabahin sa katuyuan sa nasangpit nga kalihukan aron mapa-ila sa mga delegado og ma-familiarize nila ang mga kulturang Filipino. (Beth Ruiz)
