BUTUAN CITY – Natapos kagahapong adlawa ang gihimong Butuanon Language Camp sa Barangay Babag ning siyudad sa Butuan human gisugdan niadtong Biernes, Abril 26 kansa gipangunahan ni Vice Mayor Lawrence Lemuel Fortun kauban sa pipila ka mga empleyado sa lokal nga panggamhanan sa Butuan, mga magtutungha sa Caraga State University ug sa Philippine Science High School.
Tumong sa Butuanon Language Camp ang subling pagpabangon sa paglitok sa pinulungang Butuanon ug ang pagbalik sa kultura sa mga Butuanon.
Sigon ni Jody Navarra, nanguna usab sa mga partisipante, tuig 2006 pa gisugdan ang Butuanon Language Camp diin ma-expose og pila ka adlaw ug gabii ang mga partisipante, sa lugar nga dunay taas nga porsiento sa kumunidad nga migamit sa pinulungan nga Butuanon.
Human sa maong kalihukan, ang 30 kapin ka mga partisipante gikan sa Sanguniang Panlungsod mugamit na og pinulungang Butuanon pag-abot sa opisina samtang ang mga batan-on, mugamit usab niini diha sa ilang panimalay og kumunidad.
Tungod niini, naglaum si Navarra nga madugangan og 10 porsiento kada-adlaw ang local language aron dili mahanaw na ang Butuanon sa umalabot nga panahon.
Napili ang Barangay Babag sa venue sa maong kalihukan tungod kay 95-porsiento sa mga namuyo sa maong barangay migamit sa pinulungang Butuanon.
