BUTUAN CITY – Nasigpatan sa militar ang presensya sa duha ka barko sa People’s Liberation Army Navy (PLA Navy) sa West Philippine Sea, samtang nagpadayon ang ika-14 nga Multilateral Maritime Cooperative Activity (MMCA) tali sa Pilipinas, United States, ug Australia sa Bajo de Masinloc.
Sumala ni Capt. Adrian Vargas, Executive Officer sa BRP Teresa Magbanua, kalit lang mitunga ang mga barko samtang nagpadayon ang joint exercises ug nagpabilin lamang sila sa gawas sa gitakdang “exercise box.”
Gipasabot niya nga wala miduol ang mga barko sa exercise area ug wala usab nag-radio challenge ug wala na usab naghimo og challenge ang Pilipinas tungod kay wala man kini nakaapekto sa ehersisyo.
Bisan pa sa pagpaniid sa mga barko nga konektado sa Chinese Communist Party, malampuson gihapon nga nahuman ang MMCA kansang tumong mao ang pagpalig-on sa abilidad ug koordinasyon sa Pilipinas uban sa iyang mga kaalyado, ilabina sa pagpa-uswag sa maritime capabilities.
