BUTUAN CITY – Duha ka mga small scale miners ang kumpirmadong patay samtang usa ang na-ospital human natabunan sa midahiling yuta ang ilang gisudlang minahan sa Sitio Piriko, Purok 4, Barangay Anomar, Surigao City, kagahapon sa hapon.
Sigon ni Surigao City Disaster Risk Reduction and Management Office chief Threlcie Villaces, nakadawat sila og tawag pasado alas-3:29 kagahapon sa hapon nga nagpahibalo sa maong insidente rason nga dali nilang girespondehan uban sa lain pang mga rescue units gikan sa Surigao City Police Office, Bureau of Fire Protection, Philippine Coast Guard, ug Philippine Army.
Didto narekober ang mga patay nga nailang sila Gernando Paymalan Sr. ug Charlito Tañania, samtang naluwas si Vic Manuel Dela Torre ug gidala sa ospital.
Migawas sa ilang inisyal nga imbestigasyon nga open pit mining ang gisudlan sa mga biktima kondiin tungod sa pila ka adlaw nga mga pag-ulan, midahili ang kilid sa bukid diin kini nahimutang hinungdan sa casualty.
