BUTUAN CITY – Duha na ka mga medalyang bulawan ang nahatag sa jiu-jitsu team alang sa Pilipinas sa nagpadayong 2025 Southeast Asian kon SEA Games kini human ang impresibong performance sa mga Filipino jiu-jitsu artists nga sila Kimberly Custodio ug Dean Roxas sa ilang sunod-sunod nga away nga gipahigayon sa Ronnaphakat Building sa Navaminda Kasatiryahiraj Air Force Academy.
Napildi ni Roxas ang Singaporean nga si Aacus Hou Yu Ee sa Jiu-jitsu Ne-Waza -85 kgs pinaagi sa dali nga submission human usab niya unang napildi ang mga representante sa Vietnam ug Indonesia sa elimination rounds.
Kini ang iyang ikaduhang medalyang bulawan sa susamang event human sa iyang una niadtong 2019 SEA Games.
Napildi usab ni Custodio ang iyang Thai nga kontra nga si Sugun Nutchaya sa 48kg ne-waza jiu-jitsu kondiin iyang nakuha ang tulo ka puntos sa katapusang 30 segundos sa duwa, hinungdan nga napabor niya ang desisyon sa mga hurado.
Kini ang iyang unang medalyang bulawan sa SEA Games.
Ang duha ka bulawang medalya sa jiu-jitsu mao na ang ikatulo ug ika-upat nga bulawan sa Pilipinas sa nagpadayon nga regional sports competition.
