BUTUAN CITY – Gipasakaan na og mga kasong paglapas sa Republic Act 9165 kansa mas nailang Comprehensive Dangerous Drugs Act of 2002 ingon man illegal possession of firearms and ammunitions ang duha ka mga drug personalities nga nakuhaan og kapin sa ₱4.7-M nga kantidad sa ilegal nga druga atol sa gipahigayong anti-illegal drug operation pasado ala-una sa kaadlawon niadtong weekend sa Purok 1, Brgy. Villa Kananga ning siyudad sa Butuan.
Sigon ni Butuan City Police Office spokesperson PLt Joy March Estioco, miresulta kini sa pagkasikop sa mga drug suspects nga gi-ilang sila alyas Jim 52 anyos, Street Level Individual, residente sa Brgy. Pob. Esperanza, Agusan del Sur, ug alyas Chris, 42 anyos, High Value Individual ug residente sa Brgy. Agao ning siyudad sa Butuan.
Ang maong kantidad sa ilegal nga druga gilangkuban sa gibana-banang 700-gramos nga shabu nga mikantaidad og 4.7- milyones pisos ug 20 gramos nga marijuana nga nagkantidad og 2,400-pisos kondiin narekober usab sa maong operasyon ang usa ka .45 caliber pistol uban sa magazine ug buhing bala.
Dugang pa ni Estioco, ubay-ubay nga mga police units ang mihimo sa operasyon kondiin apil sa gipakusgan nila ang Oplan SACLEO rason nga ubay-ubay usab nga mga accomplishments ang ilang nahimo.
Misaad usab kining padayon silang maghatag og seguridad sa dakbayan sa Butuan aron mapugngan ang mga tawo nga mosulod sa ilegal nga kalihokan, diin ang mga lower units mismo ang mangunay sa pagpatuman sa balaod.
