BUTUAN CITY – Nakatala na usab ug dugang ihap sa covid-19 ang rehiyon sa caraga. Kini ang gikumpirma ni DOH Regional Director Jose Llacuna Jr sa usa ka online briefing kagahapong adlawa.
Nadawat sa buhatan ang 94 ka RT PCR Results diin 67 niini negatibo sa test samtang 27 ang nagpositibo sa COVID 19.
Gilangkuban ang 27 ka pasyente sa 15 ka babae ug 12 ka mga lalaki nga nag edad sa 20 hangtud 50 anyos. Sa Butuan City, ang 21 ka kaso nga nadugang pulos mga local transmission diin 13 niini sa Barangay Buhangin, 2 sa Ong Yiu, 1 sa Fort Poyohon, 3 sa Bayanihan, 1 sa Bading, ug 1 sa Villa Kananga, 6 usab niini ang Locally Stranded Individuals kon LSIs. Sa mga niini, 20 dunay mga close contacts sa local confirmed cases diin usa ang frontliner sa usa ka health facility, Usa usab ang walay history sa byahe o exposure sa COVID-19 nga area.
Natala usab ang upat ka kaso sa Agusan del Sur diin tag usa ang munisipalidad sa Bunawan, Esperanza, Loreto,ug Rosario.
Ug duha gikan sa Surigao del Norte pinaagi sa mga lungsod niini nga Mainit ug tubod nga dunay tag-usa ka kaso. Sa 27 nga bag-ong COVID 19 cases , 67% kon 18 ang nagpakita og mild symptoms ug tulo usab ang naka admit sa ospital.
Ang Siyam kon 33% niini mga asymptomatic ug ang nahabilin nga mga pasyente anaa sa mga pasilidad sa quarantine ug striktong mipailalom sa monitoring.
As of July 25, ang Caraga region duna nay kinatibuk-ang 272 ka mga kumpirmadong kaso sa COIVD-19 diin 177 ang mga nakarekober ug na discharged na samtang usa na ang namatay.
Sa karon ang Agusan del Norte dunay 51 ka kaso sa sakit, 67 sa Surigao del Norte,16 sa Surigao del Sur, 4 sa Bayugan City, 9 sa Bislig City, 7 sa Cabadbaran City, 10 sa Surigao City , 1 sa Tandag City, ug 76 diri sa syudad sa Butuan.
Ug hugot na nga gitutukan sa buhatan ang pagsaka sa kaso sa COVID-19 dungan sa panawagan nga musunod ang katawhan ning rehiyon sa mga health protocols aron sa ingon nga mabatokan ang padayong pagkaylap nga sakit.
