BUTUAN CITY – Ipatuman sa lokal nga kagamhanan sa Butuan City ang bag-ong queueing system alang sa 2026 Business One-Stop Shop kon BOSS, pinaagi sa Business Permits and Licensing Department ug sa City Information and Communications Technology Department.
Pinaagi sa maong sistema, malikayan ang taas nga linya ug paghulat sa mga aplikante tungod kay mahatagan na sila og klarong turno sa ilang transaksiyon aron mapadali ang proseso, malikayan ang red tape, ug mapalambo ang kalidad sa serbisyo publiko.
Bisan pa man niini, padayon gihapon ang opsyon sa online payment alang sa mga nagproseso sa ilang business permit, aron mas sayon ug mas hapsay ang transaksiyon.
Kini nga inisyatiba kabahin sa padayon nga paningkamot sa Butuan City government sa paghatag og mas episyente, transparent, ug business-friendly nga serbisyo publiko, kansa naglantaw sa mas modernong paagi sa pagserbisyo sa katawhan ug sa lokal nga negosyo.
