BUTUAN CITY – Gipatuman na sa Iloilo City ang napulo ka adlaw nga gun ban isip kabahin sa security measures alang sa high level Association of Southeast Asian Nations kon ASEAN meeting sa gitakdang himuon karong Miyerkules hangtud Biernes, Pebrero 25 hangtud 27.
Sigon sa Police Regional Office-6, epektibo ang temporary suspension sa permit to carry firearms outside of residence sugod niadtong Biernes, Pebrero 20 ug mulungtad hangtud sa Marso 1.
Ilalom niini, bugtong ang mga uniformed ug non-uniformed personnel lang gikan sa mga otorisadong law enforcement agencies ang tugutang magdala og armas.
Sigon ni PCol Wilbert Parilla, officer-in-charge sa Iloilo City Police Office, na-deploy na nila ang kapin sa 1,900 ka mga police personnel aron maghatag og seguridad sa mga delegado sulod sa tulo ka adlaw nga panagtigom sa mga ministers gikan sa mga nasud nga membro sa maong regional bloc.
