BUTUAN CITY – Nakatala ang Dinagat Island Provincial Disaster Risk Reduction and Management Council (PDRRMC) og 25 ka mga patay samtang 315 ang angol sa pagkuso-kuso sa bagyong Odette.
Sa situational report nga gipagawas ni Rosario Alon, Jra. ang Provincial DRRM Officer sa Dinagat islands, as of kagahapong adlawa, nakatala usab sila og 122 ka mga kaso sa acute gastroenteritis sa Brgy. Rita Glenda sa Basilisa, 3 ka mga barangays sa Cagdianao nga mao ang Del Pilar, Maatas, ug R. Ecleo, usa ka barangay sa Dinagat nga mao ang New Mabuhay, 6 ka barangay sa San Jose nga mao ang Aurelio, Poblacion, Sta. Cruz,Jacquez, Matingbe og Justiniana Edera ug duha ka barangays sa Tubajon nga gilangkuban sa Mabini ug Malinao.
Gidala ang 23 ka mga indibidwal sa Dinagat District Hospital tungod na sa posibleng outbreaks sa gastroenteritis nga posibleng mu-igo sa mga sunod nga adlaw tungod na sa kawala’y suplay sa limpyong tubig ma-inom.
Samtang sa kinatibuk-ang ihap sa kabalayan, totally damage ang 28,436 ka mga balay ug 3,157 ang partially damaged.
Sa agrikultura ug isdaan, mi-abot sa kapin 401-milyunes pesos ang natalang damyos; samtang 4.2 biyunes pesos ang damyos sa public ug private critical facilities sa munisipalidad sa Basilisa, Cagdianao ug San Jose.
Nagpadayon pa gihapon ang pagpaabot sa mga relief goods ug assistance sa nasangpit nga mga lugar sa probinsya nga gipang-apod apod sa mga apektadong pamilya.
