BOMBO BUTUAN – Nahatagan na og desenteng lubong ang magti-ayong kanhi mga rebeldeng New People’s Army human nakabot ang ilang kalabera, dul-an 20 ka tuig human sila gipatay sa mga rebelde didto sa Sitio Carbon, Brgy. Lawan-Lawan, lungsod sa Las Nieves, Agusan del Norte.
Kini human gikabot ang ilang gilubngan subay na usab sa gilusad nga Oplan Lakbay Hukay pagpanguna sa mga sakop sa Office of the Presidential Adviser on the Indigenous People’s Concern kon OPAIPC.
Nasayrang nga gipatay sa mga rebelde pagpanguna ni Kumander Joker si Datu Dalaw Manggwanta uban sa iyang mabdos nga asawa kansa nakita mismo sa ilang anak nga karon usa na ka CAFGU member og maoy nagtuod sa ilang gilubngan.
Sigon ni Major Clarito Cerna sa OPAIPC, kini ang unang lakang nga gihimo sa maong buhatan ubos sa kamanduan ni OPAIPC Undersecretary Allen Capuyan subay na usab sa ilang mandatu nga tutukan ang mga lumad sa tibuok nasud nga mao matud pa’y target sa pagpanglupig sa mga rebeldeng NPA.
Kini gawas pa sa pagpahimulos sa mga rebelde ngadto kanila og sa iyang gipanunod nga kayutaan gikan sa ilang katigulangan.
Base matud pa sa kamanduan ni Usec. Capuyan, 25 ka mga lalawigan ang ilang pahigayunan sa Oplan Lakbay Hukay aron matumbok ang tinuod nga modus sa mga rebelde.
Gani, sa lalawigan sa Agusan del Norte sila nagsugod tungod sa mga available na nga tuburan sa impormasyon og sa natud-an na nga lugar nga gilubngan sa mga lumad. (Beth Ruiz)
