BUTUAN CITY – Dili mu-ubos sa 22 ka mga migrants ang patay samtang laing 65 ang angol human nalimbuwad ang ilang gisakyang trak sa Afar region sa Ethiopia.
Gika-ingong 85 ka mga Ethiopian migrants ang mibiyahe sa eastern migration nga ruta dihang ang ilang gisakyang trak, milimbuwad sa lungsod sa Semera samtang wala pa masuta ang ilang padulngan apan kasagari, gikan sa ilang nasud agi sa Djibouti, mutabok ang mga migrants sa Red Sea padulong ngadto sa Yemen, lahos ngadto sa Saudi Arabia ug ubang mga nasud sa Middle East.
Ang Yemen mao ang nag-unang agi-anan sa mga migrants gikan sa Horn of Africa padulong ngadto sa mga Gulf states aron mangita og trabaho.
Sa 65 ka mga angol, 30 matud pa niini ang anaa sa kritikal nga kondisyon.
Una nang gihulagway sa International Organization for Migration (IOM) ang panaw gikan sa gibansagang Horn of Africa nga gilangkuban sa Somalia, Djibouti, Ethiopia ug Eritrea padulong ngadto sa Yemen isip usa sa pinaka-ukupado ug pinakadelikadong sagol nga ruta sa migration.
