BUTUAN CITY – Laing insedente na usab sa hikog ang natala sa probinsiya sa Agusan Del Norte sulod lang sa pila ka adlaw. Kini human ang insidente kagahapong adlawa sa Purok 11, Barangay La Union, siyudad sa Cabadbaran diin nakita nalang nga nagbitay ang biktima kagahapon sa buntag.
Nasayrang pasado alas 12:30 sa udtu sa dihang mitawag ang usa ka Josaphat Japson ngadto sa Cabadbaran City Police Station may kalabutan sa maong panghitabo.
Daling miresponde ang kapulisan sa pagpanguna ni Police Executive Master Seargent Juniel Gamayon og didto nailhan ang biktima nga si Ryan Cuestas Porras, 22-anyos dunay kapuyo og residente sa maong dapit.
Gidala sa Cabadbaran District Hospital ang patay’ng lawas alang sa post mortem examination.
Gitoohang tungod sa depression rasong nabuhat sa lalaki ang paghunos sa iyang kinabuhi, base na usab sa pamahayag sa inahan nga si Marian Porras.
Mahinumdumang sa nakalabay nga adlaw lang sa dihang natala usab ang paghikog sa 14-anyos nga bayong-bayong sa may Barangay Tagabaka, ning siyudad sa Butuan.
