BUTUAN CITY – Hingpit nang nakaduso sa ilang courtesy resignation ang 21 ka mga police Colonel dinhe sa rehiyon sa Caraga isip pagsunod sa panawagan ni Department of Interior and Local Government kon DILG Secretary Benjamin Abalos jr.
Kagahapon sa buntag gihimo ang pagsubmite sa ilang courtesy resignation. Sigon ni Police Major Jennifer Ometer, Regional Information Officer sa Police Regional Office kon PRO-13 nga gipakita sa mga nasangpit nga opisyal ang ilang sensiridad og walay gikahadlokan sa pagsunod sa panawagan.
Una nang nakasubmite sa iyang resignation ang nag-inusarang heneral sa Caraga nga si Police Regional Office-13 Director Brigadier Gen Pablo Labra II.
Sumala ni Regional Director Labra, ang pagsunod sa panawagan, pagpakita lamang nila sa kawala’y kahadlok nga moatubang sa mga hagit.
Nagtoo kini nga ang nasangpit nga lakang, makatabang aron matapos na ang mga pagduda o akusasyon nga gibato ngadto sa Philippine National Police ilabina sa isyu sa illegal nga druga.
