BUTUAN CITY – Mitala og pinaka-unang hikog ang siyudad sa Butuan ning tuig 2023 diin ning higayona usa ka sacristan ang biktima.
Base sa taho sa Butuan City Police Station-4, natigayon ang insidente sa Purok-2, Barangay Salvacion ning siyudad niadtong Enero 10 sa alas 3:00 sa kaadlawon apan kagahapon palang sa ala1:00 sa hapon napaabot ngadto sa kapulisan.
Naila ang biktima nga si Roel Purisima Librero, 21-anyos, olitawo, grade 11 student kansa sakristan sa Romano Katoliko. Nasayran nga ang amahan mismo nga si Ruben Burias Librero, 52-anyos, usa ka panday, ang nakadiskubre sa iyang anak nga nagbitay na sulod sa iyang lawak gamit ang pula nga cord sa iyang sotana nga gibana-banang 3 metros ang gitas-on.
Walay gininhawa na matud pa ang biktima sa dihang gibadbaran sa amahan samtang kumbinsido kini nga walay foul play ang kamatayon sa anak.
Migawas sa inisyal nga pakisusi sa kapulisan nga ang biktima nakapamabdos sa usa ka babaye nga gitakdang manganak karung umaabot nga Marso 2023.
Nag-request na usab ang Butuan City Police Station-4 og Post Mortem Examination sa patay’ng lawas nga gihaya karun sa usa ka punerarya nga nahimutang sa Barangay Maon, Butuan City.
