BUTUAN CITY -Gipaniguro ni acting House Appropriations Panel Chair ug Marikina Representative Stella Luz Quimbo nga ang 2025 national budget nasubay sa balaud, balido ug hingpit nga ipatuman. Gipadayag kini ni Quimbo subay sa nanggawas nga mga isyu kalabot sa mga “blank items” nga nasulod sa 2025 General Appropriations Act.
Gipalig-on usab ni Quimbo ang mga naha-unang pamahayag sa Executive Secretary Lucas Bersamin, Department of Budget and Management, liderato sa Senado, ug mismong si Pangulo Bongbong Marcos kalabot niini. Sigon ni Quimbo, ang enrolled General Appropriations Bill, kumpleto ug wala’y blangkong alokasyon sa kapin 235 thousand line items.
Gitugutan usab matud pa sa Bicameral Report ang mga technical secretariat sa susamang kapulungan sa Kongreso nga magpatuman og corrections ug pagplastar kung kinahanglaon ug wala kini naka-apekto sa integridad o legalidad sa badyet. Dihang mipirma matud pa ang mga miyembro sa Bicameral Committee sa report, ang tanan matud pa nga mga appropriations, natumbok na og aprubado.
Gitawag usab ni Quimbo nga ‘politically motivated’ ang padayong pagbatikos sa budget ug sa mga gustong sagulan ang maong isyu. Nanawagan usab si Quimbo nga dili na padak-on pa ang isyu ug mas tutukan na lang ang importanteng isyu ilabina ang mga hagit nga gi-atubang sa nasud partikular ang panginahanglanon sa atong mga kababayan.
