BUTUAN CITY – Hingpit nang nahimong balaud ang 2025 national budget nga nagkantidad og 6.236-trilyunes pisos human gipirmahan ni Pangulong Ferdinand ‘Bongbong’ Marcos Jr., ang General Appropriations Act (GAA) kaganinang buntag sa usa ka seremonya sa palasyo sa Malakanyang gikan sa orihinal nga P6.352 trillion proposed budget.
Sigon sa pangulo, maximum prudence ang gigamit sa pagpirma sa GAA ug direkta siyang nag-veto og probisyon ilabina kadtong dili makatubag sa panginahanglanon sa mga tawo. Ipadayon usab ang pagpatuman sa kondisyon sa pipila ka mga items aron masiguro nga ang pampublikong pundo, gigamit sa otorisadong tumong.
Giklaro usab sa Pangulo nga ang gipirmahang budget , repleksiyon sa kolektibong saad alang sa mga economic gains sa nasud. Sa maong pundo, mi-abot usab sa kinatibuk-ang P194- billion nga kantidad niini ang iyang gi-veto.
Base sa balaud, ang Education sector ang dapat maoy duna’y taas nga pundo ug nasuta nga human sa pagsusi sa pangulo, gigahinan sa gobyerno og P1.053 trillion ang pundo sa education sector nga maoy duna’y pinakadakong budget sa 2025 nga gisundan sa Department of Public Work and Hihways kon DPWH nga anaa sa P1.034 trillion; nga gisundan sa Department of Health, Department of Social Welfare and Development, Department of Interior and Local Government, Department of Agriculture, Judiciary, ug Department of Justice.
Sigon sa Department of Budget Secretary Amenah Pangandaman, anaa sa P26 billion nga pondo ang nakibhang sa DPWH samtang P168-Billion ang nakibhang sa unprogrammed funds samtang nagpabiling zero ang subsidy budget sa PhilHealth.
