BUTUAN CITY – Nagtuo si Senadora Imee Marcos nga angayang magdesisyon na ang Executive branch nga kaltasan og 180-bilyunes pisos ang pundo sa Department of Public Works and Highways kon DPWH. Kini subay na sa gikatakdang pagpirma sa iyang igsuong si Pangulong Bongbong Marcos sa proposed 2025 national budget karong Disyembre 30.
Kinahanglan matud pang kuhaan ang pundo sa DPWH aron dili malapas ang balaud nga nagbutyag nga dapat ang Department of Education ang duna’y pinakadako og pundo sa national budget. Kini gawas na lang kung duna’y laing paagi sa pag-compute ang Malakanyang sa budgetary allocations alang sa edukasyon sa ingon mas taas pa ang pundo sa DepEd kung ikumpara sa DPWH. Ang ikunhod nga budget, igahin matud pa sa program appropriations.
Gipasabot usab sa senadora nga ang mga pundong wala nakaprograma, ipagawas lang kung duna’y sobrang pundo o kaha kung duna’y bag-ong kuhaan og pundo nga dili apil sa budget sa expenditures ug sa tuburan sa mga financing. Una nang nanawagan ang senador nga ibalik na lang sa Bicameral Conference Committee ang proposed 2025 budget aron maresolba ang mga kwaestyunableng probisyon.
