2017 Regional Educational Summit, tapuson na sa DepEd karong adlawa
BUTUAN CITY – Tapuson na karung buntag ang tulo ka adlaw nga 2017 regional educational summit sa Department of Education kon DepEd-Caraga nga gisugdan sa usa ka hotel ning siyudad sa Butuan.
Sigon ni Pedro Tecson, Regional Information Officer sa DepEd-Caraga, muabot sa 360 ka mga prinsipal sa tibook rehiyon ang nagtapok-tapok aron mapa-ambit ang ilang mga proyekto nga makapalambo sa ilang tagsa-tagsa ka tunghaan.
Gibahin sa 8 ka grupo ang tanang partisipante, kansa dunay 25 ka miyembro matag grupo, aron mahatagan ug kahigayonan nga maka-presenta sa ilang mga kalambuang nahimo kondiin ang mga speakers mao ang mismong mga prinsipal.
Ang nasangpit nga mga partisipante, mao ang unang batch nga mipailalom sa school head development program niadtong Enero diin ang nakuha nilang inputs, maoy gigamit sa pagpalambo sa ilang tagsa-tagsa ka eskwelahan.
Pagbutyag pa ni Tecson, karon nga educational summit, mao ang paglantaw kung gi-unsa pagpatuman ang mga inputs sukad niadtong Enero hangtud ning bulana.
Tumong usab niini nga mas mapalambo ang ilang proyekto, ug makita ang ilang kakulangon sa pagpatuman niini. (Rolan Janea)
