BUTUAN CITY – Mi-abot na sa 200 ka mga establisamiento sa Siargao Island, Surigao del Norte ang na-isyuhan og notices of violation tungod sa pag-operate nga wala’y environmental compliance certificate kon ECC.
Sigon sa Department of Environment and Natural Resources kon DENR-, migawas ang maong mga notisya human gikumpirma sa mga opisyal nga 83-porsiento sa mga tourism-related nga negosyo sa surfing capital sa nasud ang wala’y ECC.
Base sa latest data gikan sa DENR, makita nga 192 lang sa mga establisamiento nga nagrepresentar sa 17-porsiento sa 1,108 ka mga tourism-related businesses sa Siargao ang duna’y ECC samtang ang nahabiling 916 nga nagrepresenta sa 83-porsiento, nag-operate nga wala’y ECCs.
Sigon ni Environment Undersecretary Jonas Leones, wala’y rason nga ang maong mga establisamieno dili makakuha og ECC human gilusad ang DENR Services on Wheels sa maong isla nga nagtinguha pagtubag sa panginahanglanon sa mga establisamiento.
Ang maong mobile initiative usa ka one-stop shop nga maghatag sa mga komunidad og routine services nga dili na kinahanglang mu-adto sa mainland Surigao.
Pinaagi matud pa sa Project Transform ug sa DENR Services on Wheels, matag-karon ug unya nilang susihon ang mga establisamiento aron masiguro nga duna sila’y gihuptang mga importanteng permits aron maka-operate.
