BUTUAN CITY – Mag-co-exist kon parehong magamit ning panahuna ang karaang 20-pesos nga kwartang papel ug ang bag-ong 20-pesos nga sinsilyo human gipagawas kagahapong adlawa ang bag-ong 20-pesos nga sinsilyo og enhanced nga 5-piso coin.
Sa eksklusibong pakighinabi sa Bombo Radyo Butuan, gibutyag ni Glizriel Rose Quijada – bank officer 2 sa Bangko Sentral ng Pilipinas kon BSP-Butuan nga tungod niini sugod karon dili na mag-imprinta og 20-pesos nga kwartang papel ang ilang main office rason nga inanay rang mawala kini gikan sa sirkulasyon pinaagi sa natural attrition.
Kini tungod kay sa ngadto-ngadto mabalik ra sa ilang mga bank branches sa tibuok nasud ang kwartang papel og dinhi na unya kini muretiro dungan sa pagklaro nga wala pa sila’y nadawat nga mando nga i-demonitize kin ikon kuhaan kini og value.
Gidugang sa opisyal nga gipabilin ang pipila sa mga major elements nga anaa sa maong kwartang papel sama sa hulagway ni Pangulong Manuel Quezon, ang unang presidente sa Philippine Commonwealth nga anaa sa atubangang bahin sa sinsilyo. Samtang sa luyong bahin niini, makita ang BSP logo ug ang palasyo sa Malakanyang, ang official residence sa Philippine President. Anaa usab sa new generation coin kon NGC Coin Series ang buwak nga Nilad, nga mao matud pa’y origin sa pagkuha sa pangalan sa capital Manila.
Gipasabot ni Quijada nga pinakatumong sa Bangko Sental pagpagawas sa sinsilyo na nga 20-pesos mao ang pagpataas sa life circulation niini ilabina nga kini ang kasagaring gigamit diha sa sirkulasyon rason nga dali ra madugta ang papel nga bersyon niini.
Gipasabot ni Quijada nga dili maghatag og kalibog sa publiko ang sinsilyong 20-pesos tungod kay duna kini’y bronze composition sa kilid samtang nickel usab ang tunga nga bahin rason nga sayon ra kining ma-ilhan kumpara sa ubang mga sinsilyo gawas nga duna usab kini’y microprints ug identifiable edge aron malikayan ang pagsundog niini. Ang 20-pesos nga sinsilyo dako og kilid kumpara sa 10-pesos.
