BUTUAN CITY – Gelayon nga mitunol og tabang ang City Social Welfare and Development kon CSWD ning siyudad sa Butuan sa 20 ka pamilya nga apektado sa dakong sunog kagahapon sa hapon sa may Purok Alugbati, Barangay Golden Ribbon.
Miarangkada usab ang Mobile Kitchen diin naghatag kita ug Hot Meal para matagaan ang mga nasunugan sa init nga pospas samtang kini temporaryong gipahiluna sa Golden Ribbon Covered Court nga nagsilbing Evacuation Center.
Nasayrang nadawat ang fire call pasado alas 5:42 sa hapon nga daling gi-arangkadahan sa kabomberuhan diin muabot sa 8 ka fire truck ang miresponde gikan sa BFP-Butuan Fire Station, Ampayon Fire Station, Agusan Filipino Fire Vilunteer ug uban pang Fire Volunteer.
Nadeklarang fireout kini bandang alas 8:50 sa gabii og naugdaw ang 12 ka panimalay nga gama sa light materials.
Nawad-an usab sa panimoot ang usa ka bombero tungod sa baga nga aso apan anaa na kini sa luwas nga kahimtang samtang usa ka sakyanan og single motor usab ang nalakip sa nasunog.
Sa kasamtangan padayon pa ang imbestigasyon sa otoridad aron matumbok ang hinungdan sa pag-ulbo sa kalayu nga gitoohang gikan sa panimalay nga noted nang gihimog drug den sa mga kabatan-onan.
