BUTUAN CITY – Nakasikop ang kapulisan ning rehiyon sa Caraga og 20 ka mga illegal loggers samtang nakumpiska ang 188-mil 700 pesos nga kantidad sa ginabas ang kahoy sa managlahing operasyon nga gipahigayon sugod niadtong Hunyo 17 ngadto sa Hulyo 7, ning tuiga 2019.
Sigon ni Brigadier General Gilberto DC Cruz, Police Regional Office kon PRO-13 director, sa maong ihap, 17 niini ang nadakpan sa Surigao del Sur; 2 sa Surigao del Norte; ug usa sa Agusan del Sur.
Ang gipatuman nga 21 ka operations sulod sa tulo ka semana miresulta sa pagkakumpiska sa 654 board feet sa illegal nga ginabas nga kahoy’ng lawaan, magkuno ug lubi.
Sumala sa regional director, magpadayon ang ilang giyera kontra sa mga malapason sa balaod nga nagprotektar sa kinaiyahan alayon na usab sa suporta sa uban pang hingtungdan nga ahensiya sa gobyerno.
Ang mga responsabling indibidwal nga nag-guba sa kinaiyahan, gipanegurong mataral ngadto sa hukmanan.
Kung mahinumduman, niadtong HUlyo 7, 2019, ang mga elemento sa Hinatuan Municipal Police Station nakakumpiska og 202 board feet sa kahoy nga tuog nga nagkantidad sa 6-mil 79 pesos sa Brgy. Bitoon, Hinatuan, Surigao del Sur. Asa gihimung follow-up operation, natumbok ang suspetsado nga si Raymundo O. Abelgas, residente sa Magallanes, Agusan del Norte.
