BUTUAN CITY – Gi-anunsyo sa Philippine Embassy sa Abu Dhabi nga apil matud pa ang duha ka Pilipino sa 25 nga naaresto sa United Arab Emirates (UAE) tungod sa pagpost og mga hulagway ug videos sa social media platforms mahitungod sa mga airstrikes ug bag-ohay lang nga mga air defense interceptions sa Dubai.
Sa pamahayag sa embahada, gipaneguro niini nga padayon ang ilang pakig-alayon ug mihimo sa close monitoring ang ilang buhatan mahitungod sa maong mga impormasyon alang na usab sa opisyal nga kumpirmasyon sa nasangpit nga taho.
Ihatag usab sa Philippine Embassy ug bisan sa Consulate General niini ang tibook pagrespeto sa soberaniya sa UAE ug bisan ang katungod niini nga ipatuman ang ilang mga nagtunhay nga balaod alang sa pagseguro sa ilang national security, pagbatuk sa cybersecurity threats ug ang pagseguro nga masunod ang mga nagtunhay nga public order laws.
Alayon niini, gipahinumduman sa embahada ang mga Pilipino sa UAE nga mahimong responsable ug mas mag-amping sa pagpa-ambit og mga impormasyon sa social media ug messaging platforms ilabina kung possible kining kalapasan sa mga nagtunhay nga balaod sa ilang mga hosting countries.
Giabisuhan usab ang mga Pilipino sa rehiyon nga likayan ang pagkuha og hulagway, videos o bisan ang pagkomento sa mga dili beripikado ug sensitibong mga posts o content aron malikayan ang pagpakuyanap sa unverified ug speculative information.
Gawas niini, gitambagan usab ang mga kababayan sa UAE nga mas motoo sa mga anunsyo ug impormasyon gikan sa mga UAE authorities sa ingon ini nga mga sitwasyon.
Samtang gisiguro usab sa emebahada ug sa Consulate General niini nga padayon silang makig-alayon sa mga otoridad sa UAE aron maseguro ang kahimtang sa mga naarestong Pilipino.
