BUTUAN CITY – Duha ang natalang patay human mi-igo sa Toyota Fortuner ang duha ka lalaking nalabay human na-overshoot ang ilang gisakyang motorsiklo pasado alas-9:30 kagabii sa may Bayugan City, lalawigan sa Agusan del Sur.
Gi-ila ni Police Staff Sergeant Anthony Macarayan ang mga biktimang sila Jomar Torayno, 30-anyos, ulitawo, residente sa Purok 1, Brgy. Mabuhay sakop sa maong siyudad og ang 17-anyos pang driver nga si Marvin Canalita sa Purok 2 sa susamang barangay.
Sigon sa maong imbestigador, pauli na unta ang mga biktima dihang ilang gilikayan ang road signage apan na-overshoot ang ilang gisakyang motorsiklo hinungdan sa ilang pagkalabog nga mi-igo sa atubangang bahin sa nakasugat nga Fortuner nga gimaneho ni Ryan Polinar taga-Purok 3, Brgy. Concepcion sa Compostela Valley Province nga patungo unta sa Davao City gikan sa Surigao City.
Anaa na sa kostudiya sa kapulisan ang driver sa Fortuner samtang naghulat pa sa himuong lakang sa pamilya sa mga biktimang parehong gideklarang dead on arrival dihang gidala sa ospital.
