BUTUAN CITY – Nakabsan sa kinabuhi ang duha ka indibidwal samtang ubay-ubay ang angol human magsungag ang usa ka depasaheruang multicab ug elf truck sa Purok-8, Barangay Bancasi, Butuan City alas-5:15 sa hapon kagahapong adlawa.
Naila ang mga namatay nga si Alegi Ybanez Bawiga 21-anyos ug residente sa Matabao, Buenavista, Agusan del Norte, driver sa multicab ug Irish Salva, 45-anyos residente sa Barangay Imadejas ning syudad sa Butuan nga usa sa mga pasahero sa maong multicab.
Sa report sa Butuan City Police Station 3, padulong unta sa Buenavista, Agusan del Norte ang depasaheruang multicab apan pag-abot sa dapit nga nahitabuan, kalit lang mibangga kini sa misulay og overtake nga elf truck nga gimanihuan ni Glenn Helig Vicente, 42-anyos, residente sa Montevista Subd., Brgy. San Vicente, Butuan City.
Sa maong pagbangga ug tungod sa kakusog sa impact parehong nadamyos ang duha ka sakyanan apan maayong pagkakuba ang walang bahin sa de-pasaheroang multicab.
Gidala sa balay tambalanan ang tanang nalambigit sa aksidente labi sila Julian Grace Balane, Syrish Genson Rodriguez, ug Angelo Alburo Pursuelo nga sakay sa depsaheroang multicab kinsa naka-angkon og dili tiaw nga samad ug bun-og sa kalawasan samtang nawad-an og panimuot ang driver sa elf truck human sa insidente.
Samtang, milagro nga wala na-unsa ang usa ka two-week old nga masuso nga sakay usab sa maong multicab taliwala nga gikataho nga puno-puno kini sa mga pasahero, apan naka-angkon og mga samad ug bun-og ang inahan niini nga si Annabelle Sanchez nga residente sa Manapa Buenavista, Agusan del Norte.
Samtang, gisaysay sa nakasaksi sa maong aksidente nga si Judy dela Calzada, minyo ug residente sa Brgy. Aklan, Nasipit, Agusan del Norte, nagsunod siya sa multicab nga padulong sa Buenavista.
Nakita matud pa niyang mipadulong sa multicab ang bonggo kondiin maayong pagkabangga sa simod niini ngadto sa walang bahin sa multicab rason nga dinhi na siya mi-ambak gikan sa iyang gimanehuang motorsiklo.
Nagpasalamat na lang siya nga bun-og ra ang iyang na-angkon ug duna’y gamay nga deperensya sa iyang motorsiklo.
Samtang gibutyag uab ni Guadalupe Balane, residente sa lungsod sa Buenavista nga sakay sa multicab ang iyang apo kinsa naghilak na dihang iyang gitawagan tungod kay nadisgrasya na diay ang iyang gisakyan hinungdan sa dali niyang pagbiyahe padulong sa lugar nga nadisgrasyahan.
