BUTUAN CITY – Gipahimoan na ug report ni Col. Joel Inacay, commander sa technical operation group sa Philippine Air Force nga nakabase sa Cagayan De Oro City ang matud pa dili maayong pakig-estorya sa usa ka sundalong sakay sa nag-emergency landing nga chopper sa Barangay Kinamlutan, siyudad sa Butuan kagahapon sa alas 2:00 sa hapon.
Nasayrang gi-asuy sa media man nga si Mike Imbo sa usa sa mga pamantalaan ning rehiyon, ang dili maayo nga pagbadlong sa usa sa 4 ka sakay sa maong chopper diin nag-singgit-singgit kini ug gigamit pa ang pulong nga martial law.
Sumala pa ni Col. Inacay, gipahinumduman na niya ang maong mga sundalo nga kinahanglan ang maayong pakiglambigit sa mga sibilyan bisan paman sa nagtunhay nga martial law tungod kay kini ang gusto ni Pangulong Rodrigo Duterte.
Alayon niini gipahimoan gelayon niya kini ug report aron makuha ang saktong detalye.
Nasayrang dunay mission unta ang maong chopper apan nagka-aberya kini ug kinahanglan nga mag-emergency landing.
Hinoon walay natalang injury sa mga sakay niini ug ang chopper, ila kining ipa-ayo. Una nang gi-asuy ni Mike Imbo nga dali silang mi-arangkada sa area human nakadawat ug taho mahitungod sa maong panghitabo.
Apan sa dihang kuhaan na unta nila ug hulagway ang chopper, kalit silang gibadlong sa naka-sibilyan nga lakip sa sakay sa maong chopper.
Apan ang gikadismaya sa maong media man, mao ang pagsinggit-singgit sa maong indibidwal ug gigamit pa ang pulong nga martial law.
Nangayu matud pa siya ug dispensa sa maong sundalo apan padayon silang gising-hagan. (Rolan Janea)
