BUTUAN CITY – Nagpagawas og pamahayag kagahapong adlawa ang Criminal Investigation and Detection Group kon CIDG mahitungod sa nadakpan nilang duha ka koreano og siyam ka Filipinos tungod sa alegasyong illegal mining sa Butuan City.
Giila ni PCOL ZACARIAS NOEL B VILLEGAS, Regional Chief sa CIDG-Caraga, ang mga Koreano nga sila si Joung Whan Oh ug Young Gwan Mun nga pulos taga Cagayan De Oro City, uban sa mga Pinoy nga sila alyas John, Jenalyn, Herbert, Jenie, Noel, Macky, Beth, Marvin, ug Elmer.
Sumala sa opisyal nga sa nakalabay nga adlaw sa dihang mihimo sila og koordinasyon sa Mines and Geosciences Bureau kon MGB alang sa himoong operation sa Barangay San Vicente ning siyudad.
Pagbutyag pa niini nga ang mga suspetsado nasapon nga nag-transport sa 500 ka sako sa gidudahang mga copper ore minerals nga nagkantidad og 700-mil pesos gamit ang duha ka sakyanan nga walay saktong mining rights, permits, o agreements gikan sa MGB og uban pang otoridad rasong makonsidera kining ilegal.
Lakip usab sa nakumpiska atol sa operasyon ang mga kagamitan pangmina, testing solutions, og uban pang materyales nga gamiton sa ilegal nga pagmina.
Mag-atubang ang mga suspetsado og kasong may kalapasan sa illegal exploration, theft of minerals, and transporting minerals without permit ilalom sa Philippine Mining Act of 1995.
