BUTUAN CITY – Parehong gideklarang dead-on-arrival sa attending physician sa Butuan Medical Center ang duha ka ulitawong sakay sa motorsiklo human niini gidumbol ang usa ka prime mover.
Na-ila ang mga biktimang sila Michael Jay Yamit, 21-anyos, residente sa Purok 1, Brgy. Sacol, Buenavista, Agusan del Norte og ang angkas niining si June Ryan Dumadag, 23-anyos, residente sa Purok 3 sa susamang barangay.
Base sa inisyal nga imbestigasyon sa Traffic Section sa Butuan City Police Station 1, gikan pa sa sidlakang bahin ning siyudad ang mga biktima og pauli na unta apan pag-abot sa national highway sa Brgy. Baan Km. 3, kaganinang alas-12:20 kaganinang kaadlawon, kalit kining mipaslak sa trak og gidala gilayon sa ospital apan wala na maka-abot pang buhi.
Anaa na usab sa kostudiya sa BCPSO-1 ang driver sa prime mover nga si Jilcris Bano, 32-anyos, residente sa Purok 5, Brgy. Taligaman ning siyudad.
