BUTUAN CITY – Duha ka mga sundalong sakop sa 402nd Brigade, Philippine Army ang patay samtang laing usa ang angol sa managlahing engkwentro sa mnga lungsod sa Esperanza ug San Luis, Agusan del Sur ning mi-aging adlaw.
Sigon ni 402nd Brigade, Philippine Army commander General Maurito Licudine sa eksklusibong pakighinabi sa Bombo Radyo Butuan, ang unang engkwentro natigayon pasado alas-dies sa buntag sa Sitio Canasungay, lungsod sa Esperanza, Agusan del Sur.
Dinhi naka-agbat sa tropa sa militar sulod sa usa ka oras ang gibana-banang 30 ka mga rebeldeng sakop sa RSDG Compaq sa NCMRC hangtud nga na-abtan sila sa reinforcement troops pasado alas-3:45 sa hapon kondiin natigayon ang 30-minutong engkwentro ug dinhi na namatay si 2Lt. Kart Anthony Ayon-Ayon.
Samtang ang misuportang laing yunit, naka-agbat usab sa mga rebelde sa may Sitio Turok-Turok sa Brgy. Brgy. Mahagsay, lungsod sa San Luis sa susamang lalawigan nga miresulta usab sa pagkamatay sa laing sundalong si PFC. Dennis Pelenio ug laing usa pa ang angol.
Sa eksklusibong pakighinabi sa Bombo Radyo Butuan, gipadayag ni Gen Licudine nga natigayon ang engkwentro human girespondehan sa ilang tropa ang intelligence report kalabot sa presensya sa mga rebelde sa nasangpit nga lugar.
