BUTUAN CITY – Miresulta sa kamatayon sa duha ka target persons ang managlahing police operations kontra loose firearms kagahapon sa lungsod sa Tagbina, Surigao Del Sur.
Sigon ni Brigadier General Joselito Esquivel Jr., Regional Director sa Police Regional Office kon PRO-13, alas 5:00 sa buntag dihang bitbit sa mga personahe sa Provincial Intelligence Branch sa Surigao del Sur, Police Provincial Office ug Tagbina Municipal Station ang search warrant nga gi-isyu ni Judge Lilibeth Ladaga – presiding judge sa RTC 11th Judicial Region Branch 28 nga nakabase sa Lianga, Surigao del Sur batuk sa suspek nga si Elesio Labi alyas “Lesyo” sa Purok 6, Brgy. Maglatab, sa maong lungsod.
Sa maong operasyon, nagpabuto matud pa sa iyang dalang pistola ang suspetsado rasong mibalos ang kapulisan nga miresulta sa iyang kamatayon.
Nakumpiska sa iyang posisyon ang usa ka granada og improvised rifle nga punto .22 nga kalibre og dihang mi-abot ang mga personahe sa SOCO og gilusad ang crime scene investigation, narekober usab ang kalibre .38 revolver nga walay serial number ug puno sa buhing bala, uban sa usa ka basiyo, usa ka sundang og 2 ka basiyo sa 9mm nga pistola.
Samtang gilusad usab ang laing operasyon pasado alas-5:30 sa buntag batuk kang Allan Taer sa Purok 1, Brgy. Ugoban, sa susamang lungsod.
Dala sa mga otoridad ang search warrant No.16-2019 nga gipagawas ni Judge Lilibeth Ladaga, Presiding Judge sa RTC 11th Judicial Region, Branch 28, Lianga, Surigao del Sur, nga pinitsahan niadtong Oktobre 15, ning tuiga.
Atol sa Implementasyon, gi-ilog usab matud pa sa suspek ang M-16 rifle sa usa sa mga operating personnel rasong gipusil kini sa ka-ubanang pulis nga misangpot sa kamatayon niini samtang samaran usab ang usa ka pulis.
Sa gihimung pag-search, nakuha ang 2 ka sachets sa gitoohang shabu nga gibutang sa ibabaw sa cabinet sa suspetsado, usa ka kalibre 38 revolver nga dunay mga bala, 5 ka basyo usab sa maong armas ug usa ka granada.
Sumala pa ni PCOL Francisco D Dungo, Jr, Surigao del Sur Provincial Director, ang maong suspek ang responsable sa daghang mga pagpanglungkab sa lungsod sa Tagbina.
