BUTUAN CITY – Malampuson ang gilusad nga security operation sa tropa sa 36th Infantry “Valor” Battalion, sa pagpanguna ni Lieutenant Colonel Joselito B. Ante Jr.,human misangpot sa kamatayon sa duha ka miyembro sa rebelding New People’s Army kon NPA sa bukirang parte sa Brgy Nurcia, Lanuza, Surigao del Sur.
Natigayon ang binayloay og bala bandang alas 12:00 ang takna kaganinang udtu, Marso 22, 204.
Sa impormasyong gipagawas sa 36th Infantry “Valor” Battalion, giila ang duha nga napatay nga sila alyas Rex og Alyas Bunso nga parehong miyembro sa SRSDG Westland, North Eastern Mindanao Regional Committee (NEMRC).
Tungod sa maong engkuwentro, napugos ang mga rebelde nga mosibat ug gibilin ang duha ka mga patay’ng lawas sa ilang kauban. Samtang nakuha usab ang 4 ka mga tag-as nga kalibre sa armas diha sa encounter site.
Sumala sa kasundaluhan, gelayong mihimo sila og operasyon human nakadawat og impormasyon gikan sa mga residente nga gihulga og gipangilkilan sa walhong grupo.
Human sa engkuwentro, gi-secure sa tropa ang maong lugar aron maseguro nga luwas ang kasikbit nga mga kumunidad og malikayan ang dugang pa nga hulga.
Ang nasangpit nga operasyon nagpamaatood sa padayong paningkamot sa kasundaluhan aron maprotektahan ang mga sibilyan og mamintina ang kalinaw og kahapsay.
Gelayong gidayeg ni MGEN Michel Anayron sa JTF DIAMOND ang tropa tungod sa ilang propesyunalismo. Disiplina og kaisog sa pagtuman sa ilang misyon.
