BUTUAN CITY – Gi-proseso na sa PNP-SOCO ang mga patay’ng lawas sa duha ka rebeldeng New People’s Army kon NPA anga napatay sa engkwentro human nila gi-ambush ang tropa sa gobyerno sa may Barangay Balit, San Luis, Agusan Del Sur sa niaging alas 2:00 sa hapon.
Sigon ni Col. Mel Pagayu, Battalion Commander sa 26th Infantry Battalion, Philippine Army, pa-uli na unta ang mga sundalo nga naka-motorsiklo didto ilang patrol base sa may Brgy. Sta. Rita ka-uban ang gi-ilang Outstanding Filipino 2017 nga si Staff Sergeant Narding Pascual, dihang gi-ambush sila sa gibana-banang 30 ka mga rebeldeng miyembro sa Guerilla Front Committee 88 sa NPA.
Maayo na lang kay namatikdan nilang dunay nag-atang kanila nga mga armado hinungdan nga sila nakapangandam.
Dinhi na natigayon ang engkuwentro nga miresulta sa kamatayon sa duha ka rebelde nga taga San Pedro samtang nakumpiska usab ang usa ka AK-47 rifle ug duha ka Improvised Explosive Devices kon IEDs nga wala makabusikad.
Sa laing bahin, na-igo usab sa tiil ang anak nga lalaki sa sundalo apan luwas na kini sa makuyaw nga kahimtang samtang gi-atiman diha sa balay tambalanan.
Karon, gipahiluna na ang patay’ng lawas sa mga rebelde sa usa ka morgue sa lungsod sa Talacogon, Agusan Del Sur. (Rolan Janea)
